一切由感覺出發

Posted by : Kathy  Wong

作為一個中年人，在香港會經歷過製衣業蓬勃嘅年代。其實在我入行不久，大家已經叫這行業做 “夕陽工業”，但經過數十年，我仍然係呢行嘅從業員，由學徒到車間助理，由Pattern Maker 到Technical Designer，我從來無對這行業失去信心，雖然角色有變化，但始終人係要著衫。

我與製衣車縫結緣，我想始於”孩童”時代。我媽係織冷衫高手，除了為一眾仔女織毛衣，還會接些冷衫加工回家做 (當時接外發加工賺錢係好普遍，好多行業都有外發加工，最耳熟能詳當然係”穿膠花”)。而我家有7兄弟姊妹，我排行最小，大姐姐們都喜歡車縫做衣服，亦都有在製衣廠工作，所以自我懂事以來，家裡總會有衣車，就像電飯煲一樣。童年時住舊式公共屋邨，我想200幾300呎吧! 高峰時住了10個人，還可以容納兩部衣車，一部腳踏衣車 (我見她們很少用的，我會“捐”入車底，坐在腳踏上當搖搖板玩)，而另一部是工業用摩打衣車 (開機後非常吵耳的)，可想而知衣車在我家裡的地位有多高。現時我自己屋企仍然有一部工業用摩打衣車，但電飯煲反而沒有了。

第一代電腦平車

我家姐學劃紙樣嘅途徑係私人學校教授，當時裁剪學校很流行，例如有「公主」、「紫婷」、「楚儀」、「歐美」……等等裁剪學校，有關裁剪嘅書很多，而且部分中學對呢個科目都好重視，會有學會校友會等研究同分享知識。而我學劃紙樣嘅途徑係修讀製衣業訓練局一年制紙樣課程，經訓練局協助，之後在觀塘工業學院完成了證書課程，再之後在理工學院完成了高級證書課程。除了製衣業訓練局一年制紙樣課程，我其他所讀的，都係以半工讀形式完成。當時嘅「製衣業訓練局」就好似現時嘅「建造業訓練局」，修讀課程是不用學費，而且有津貼 (當年津貼好似係$10一日)，有進修機會。對培訓新一代及鼓勵他們入行有很大作用。雖然政府口口聲聲話對香港嘅製衣紡織業好重視，但從政策上，其實睇到政府係有 “幾” 重視 !

昔日的裁剪教材及書籍

每種行業都要隨時代去進步，做成衣、做從業人員嘅都應該不例外。我完成理工學院高級證書課程後，相隔9年，再踏入已升格嘅理工大學修讀高級文憑及學士學位課程，之後再相隔9年，再去修讀碩士，今年畢業了。在理工, 算是斷斷續續待了28年,  除了有新建築物 ; 多了賣咖啡嘅店舖; 圖書館影印由入兩毫硬幣，到用儲值卡，到改用八達通……很多時候, 我都係覺得“人面依舊, 桃花依舊”。香港製衣廠已經式微，政府亦沒有再為車縫、紙樣技術加緊培育人才。記不起由幾時開始，經常聽到話香港要發展時裝品牌，政府眼中嘅Fashion Designers，就好似魔術師，或者懂得十八般武藝，只要有ideas，有設計圖，就可以變出wow一聲嘅時裝。既然政府學府想法係「咁」，而事實又唔係「咁」，作為呢行有點歷史嘅我，又怕人生無幾多個9年，我想將車縫造衫帶回坊間推廣，就好像我大姐姐學裁剪車縫，又或是我初入行嘅年代，這是我寫blog 嘅目的 。可能係出於 ”懷舊”，而無考慮實際及時代改變。新一輩嘅fashion /紡織系學生、Fashion designers、Merchandisers……又會點諗?

伸延閱讀 

香港記憶 Hong Kong Memory - 行業焦點 : 香港製衣業的源流和軌跡