（本文純粹個人經驗，或與閣下的經歷不盡相同）
問個問題先。
點樣先叫做一個時裝設計師?
由一張平面的圖像變成一件可穿上身的衣服，當中又經過了幾多重難關呢？
**********************************************
當你畫左一張好滿意的設計圖後，並不是把圖交給跟單的同事及工場後，就能把衣服造出來的。
當你把設計圖交給他們後，他會問你一大串問題，例如：
你想做咩fit?
有冇參考樣或是參考尺寸?
你件衫用咩布做?
落唔落裡?
唔落裡既話，需唔需要做clean finish?
布紋需要直裁橫裁定斜裁?
唔同既骨位想點樣做?
你個開口想點樣做?
想落拉鍊定鈕?
鈕既話用邊款鈕?
呢個係dart定pleat?
pleat既話想做邊款?
。
。
。
所以，你要預備一份辦單，預先將件衫的細節寫下來，盡量將你的要求寫出來，當然，他們總會問到一些你沒有想到的問題。
問完一大堆問題之後，你以為就可以將腦海入面的衫做出來?
如果是的話，你便好好彩了。
當常都會先做一件頭辦，看看整體有沒有什麼問題，通常頭號問題都是關於fit/尺寸。
你以為有原辦/尺寸參考就可以做出一模一樣的，但實情是有千千萬萬個原因令到件衫變左樣，例如：
1/ 布料唔同左，隻布厚左薄左，軟身硬身都會影響到整體既衫型
2/ 紙樣師父既功力，有件原辦做參考，講到明係參考，條線彎得勁左，或唔夠彎，出黎又會好唔同
3/ 車衣師父既功力，好多時就算個紙樣無問題，明明左邊袖同右邊袖係一樣，車出黎可以左右袖唔對稱
咁好啦，當你面對住呢件個fit唔啱心水的頭辦，覺得有點怪，例如，個領位頂住個喉嚨；成件衫向後扯；個膊頭位唔順；個夾位有多餘既布等等。
你講得出見衫有問題既地方，但你點樣同工場溝通而令到他們作出有效的改善呢？
說真的，fitting呢樣野，係學校入面無乜教過，就算略有所提，當你出到黎做野，總會預上千千萬萬不同的款式，總會遇上一些奇難雜証，咁又可以點做呢？
呢個時候technical designer幫到你。
佢地可以好快咁指出件衫需要改善的地方，例如肩斜太斜/太平，會令到膊位唔順；夾圈個形太深/太淺，會影響夾位舒適度等等；領橫要加闊/減窄或領深要加深/減淺多少寸才合身；有時以免工廠還是做不來時，會動手改紙樣，確保下一件辦能做好。
說真的，fitting是靠經驗累積起來的，而經驗豐富的technical designer真的可以幫上大忙，不用做好幾轉辦也做不到你心目中的衣服。
當然不是每一間公司都會有technical designer 呢個位，所以fitting呢回事，還是邊做邊學吧。
（除了fitting，還有其他範疇都是邊做邊學，留待下回再說。）
沒有留言:
發佈留言